Image de l'auteur
Tous - تحسب بلي راك متأخر في هدفك؟ كبرت ؟ اقرأ التالي :

ملحوظة : طبعا هدرت مع هاذ الانسان منذ اسبوعين و طلبت الاذن منو باش ننشر الحكاية تعو و كان لطيف جدا و طلبكم في الدعاء ليه باش يلحق للمراد تعو و تكون حكاياتو مزهرة ⁦❤️⁩ هاذ الحكاية للناس لي تقول انا كبرت و فاتني الحال باش نحقق الحلم و جماعتي راهي كملت و تخرجت و نا مزالني بطيئ ، استغل خير التأخر فيما يصلحك و فيما تفتخر بيه ذاتك ممبعد *-* السلام عليكم ورحمة الله تعالى وبركاته مذابيكم كامل تسمعو هاذ لحكاية عبرة للناس كامل و لكل واحد ماعندوش ثقة و ارادة في نفسو .. بكري كنت نقرا عادي ا خاوتي و كنت من بين الاوائل فالمتوسطة وصلت سنة رابعة ديت البيام و طلعت اولى ثانوي 2012 بمعدل مقبول عموما 12 .. من ثم تحولنا من ولاية لولاية خلاف .. كان اونتوراج جديد و ماقدرتش نتأقلم و مشاكل مع لولاد بزاف و اقرب ناس ليا دار حادث ولله دخلت في دوامة.. لي معايا نجحو و انا عاودت العام هذاك ..الناس لي تستشفى و تضحك و ايقولو هاو لي كان يقرا زعما .. لا علينا بلعتها مرة كما ايقولو .. كنت نقرا رياضيات بزاف و كنت نعول عليها و بحكم مشاكل مع الأستاذ وليت نقل مانكذبش عليكم فالعام الثاني خفت نعول عليها ديرها بيا و نتحاوز طلعت سنة ثانية ثانوي مي لاباز مكاناش و زدت طلعت للباك ثاني لاباز مكانش بسك كلش تريش .. الباك لول ديت 5 مانجحتش .. و الباك الثاني تقصيت ب 5 سنوات بسبب شجار .. سنة 2017 .. يعني كون تحسبو ا خاوتي راحتلي سبع سنين .. ناس لي دات الباك قبلي و بعدي فالجامعات و دنيا زاهية و انا لقيت روحي فالحاسي ندير الدبلومات و بعدها زدت روحت للخدمة الوطنية 2018 و كملتها و ناس اي اقرات و وصلت و قريب تتخرج .. في خمس سنين اقصاء .. اسمع مليح ١/ درت ديبلوم تيوتار فالحاسي ٢/ فوت خدمة وطنية و كملتها ٣/ درت تمهين في هندسة توارزن و موازنة العجلات (تكوين مهني لمدة عام ) ٤/ تعلمت البرمجة و اختراق اخلاقي من دورات عالمية كهواية عبر الانترنت .. بالنسبة للبرمجة كموقع harmush و مكتبة نور فيها بزاف مراجع ٥/ تعلمت تخصص تجارة خارجية من الانترنت كهواية و دوركا بمعارفي و حامل مشروع ان شاء الله يتجسد في اقرب الآجال ٦/ استمثرت وقتي في دراسة اللغات من الانترنت و المراجع و بعدت على كل الصحاب لي داولي الوقت.. ديما نقرا فالمكتبة المركزية للولاية .. ٧/ حكمت خدمة في مصنع تابع للدولة و راني نقرا في نفس الوقت لمعدل مليح لتخصص الطب ان شاء الله .. و مازلت نتبع الاستثمارات وبإذن الله نكمل ديبلومي نفتح مشروعي الخاص كشركة ناشئة و كلش قيد الدراسة .. الناس لي كانت تضحك راهي سكتت و الشي لي قريتو اغلب الناس لي ضحكت راهي ماتعرفوش و تتمناه دورك .. و مزالت نقرا و نخدم و بإذن الله الامور تمام اذا لحجار دير جبال اي صعوبات ليدير رجال الفقر هو فقر عقول ماهوش ماديات مسألة انضباط و تخمام صحيح راني في عمري 25 سنة و مازلت نشوف الدنيا من الباب الواسع .. لي ماقراش يتاكل على الله و لي قرا ايكمل و يقرا اي شي ايساعدو الدنيا ماتدري كيفاه تديك .. تكون في حالة و تصبح في حالة و دمتم إلى الله أقرب و السلام عليكم ♥️

DzBac